काठमाडौं । राष्ट्रिय स्वतन्त्र पार्टी (रास्वपा) का सांसदले सामूहिक राजीनामा दिएका छन् । मंगलबार एक विज्ञप्ति जारी गर्दै जेनजी पुस्ताले गरेको शान्तिपूर्ण आन्दोलनमाथि सरकारले दमन गरेको र दर्जनौं युवाको ज्यान लिएको भन्दै उनीहरुले सामूहिक राजीनामा दिएका हुन् । 

वर्तमान सरकारको औचित्य पूर्णतः समाप्त भइसकेको भन्दै प्रधानमन्त्रीको तत्काल राजीनामा, घटनाको निष्पक्ष छानविन गर्न उच्चस्तरीय न्यायिक छानविन आयोग गठन, सर्वपक्षीय नागरिक सरकार, प्रधानमन्त्री, गृहमन्त्री, सञ्चारमन्त्री साथै काठमाडौं जिल्लाका प्रमुख जिल्ला अधिकारीलाई बर्खास्तीका साथै हिरासतमा लिई सबै दोषीमाथि कडा कारबाही गर्न माग गरेका छन् । 

संसदीय दलको कार्यवाहक सभापति तथा पूर्वनेता डोल प्रसाद अर्यालले हस्ताक्षर गरेको विज्ञप्तिमा दलका नेता रवि लामिछाने, उपनेता विराजभक्त श्रेष्ठ, डा. स्वर्णिम वाग्ले, डा. तोसिमा कार्की, शिशिर खनाल, सुमना श्रेष्ठ, सोबिता गौतमलगायतका सांसदको नाम समावेश गरिएको छ ।

वर्तमान संघीय संसदले कुनै पनि राष्ट्रिय मुद्दाको हल निकाल्न असमर्थ भई वैधता गुमाएको निष्कर्षमा पुग्दै आगामी निकासका लागि शिघ्र अन्तरिम नागरिक सरकार गठनको प्रस्ताव गर्दै, सरकारबाट हत्या गरिएका जेनजी योद्धाहरूप्रति हार्दिक श्रद्धाञ्जली अर्पण गर्दै घाइते भएका सबैको शिघ्र एवं निःशुल्क उपचारको पक्षमा रहँदै, देशको मुख्य सम्पति जेनजीको माग र अपेक्षामा पूर्ण समर्थन र निरन्तर आन्दोलनमा रहने समर्पणकासाथ राष्ट्रिय स्वतन्त्र पार्टीका सबै प्रतिनिधिसभा सदस्यहरु (साँसदहरु) ले सामूहिक राजीनामा दिएको हो  ।

काठमाडौं । जेनजी आन्दोलनमा सहभागी प्रदर्शनकारीहरुले सिंहदरबारको पश्चिम गेटमा आगजनी गरेका छन् । मंगलबार सिंहदरबार छिर्ने प्रयास गरेका उनीहरुलाई प्रहरीले रोकेको थियो । केही बेरमा उनीहरुले गेट अगाडि नै आगजनी गरेका हुन् । 

काठमाडौँको नयाँ बानेश्वर र माइतीघरमा जेनजीको प्रदर्शनमा सहभागी १९ जनाको मृत्यु भएपछि आन्दोलन झन् भड्किएको छ ।जेनजीहरुले आज विभिन्न राजनीतिक दलका पार्टी कार्यालय ,नेताहरुको निजी घर तोडफोड गर्ने र आगजनी गर्ने काम गरिरहेका छन् । 

कोशी । कोशी प्रदेशका आन्तरिक मामिला तथा कानुन मन्त्री रेवतिरमण भण्डारीको घरमा मंगलबार प्रदर्शनकारीले तोडफोड गरेका छन्।

कर्फ्युको अवज्ञा गर्दै सडकमा उत्रिएका आक्रोशित प्रदर्शनकारीले इटहरीस्थित भण्डारीको घरको सिसा र अगाडिको गेट तोडेका हुन्। भीडले घरमा आगजनी गर्न खोजे पनि त्यहाँ अन्य भाडामा बस्ने परिवार रहेको भन्दै केही प्रदर्शनकारीले विरोध गरेपछि आगो लगाउने प्रयास रोकिएको प्रहरी स्रोतले जनाएको छ।

यसअघि, आन्दोलनकारीहरूले नेकपा (एमाले) इटहरी पार्टी कार्यालयमा प्रवेश गरी फर्निचर तोडफोड गर्दै आगजनी गरेका थिए। कार्यालयमा पुगेको भीडले कुर्सी, टेबललगायत सामग्रीमा आगो लगाएको थियो। एमाले कार्यालयमा आगजनी गरेपछि भीड मन्त्री भण्डारीको घरतर्फ मोडिएको हो।

‘गोली हान्नेलाई कारबाही गर’ भन्दै नाराबाजीसँगै भएको तोडफोड र आगजनीका कारण इटहरीमा जारी कर्फ्युबीच स्थिति अझै तनावपूर्ण बनेको छ। विराटनगरलगायत कोशी प्रदेशका विभिन्न जिल्लाहरूमा समेत अवस्था तनावग्रस्त रहेको जनाइएको छ।

सुर्खेत । जेनजी पुस्ताको प्रदर्शनकारीले सुर्खेतमा सत्तारुढ दल नेकपा एमाले र नेपाली काँग्रेसको पार्टी कार्यालय जलाएका छन् । 

मंगलबार प्रदर्शनकारीले पार्टी कार्यालयहरुमा तोडफोड गर्नका साथै आगजनी गरेका हुन् 

प्रदर्शन नियन्त्रणणका लागि प्रहरीले अश्रुग्यास प्रहार गरेर प्रदर्शनकारीलाई तितरबितर पारेको छ ।

काठमाडौँ । प्रधानमन्त्री केपी शर्मा ओलीको भक्तपुरस्थित बालकोट निवासमा आगजनी भएको छ। ओलीको निवासतर्फ पुगेका प्रदर्शनकारीलाई नियन्त्रणमा लिन प्रहरीको गोली चलेपछि आक्रोशित भीडले निवासमा आगो लगाएको जनाइएको छ। प्रहरीले चलाएको गोली लागेर तीन जना प्रदर्शनकारी घाइते भएका छन्। उनीहरूलाई उपचारका लागि अस्पताल लगिएको छ।

आगो लगाइएपछि ओली निवास क्षेत्रबाट बाक्लो धुँवा निस्किएको छ भने त्यहाँको अवस्था नियन्त्रणबाहिर गएको बताइएको छ।

बाजुरा । बाजुरा जिल्लामा पनि जेन–जी पुस्ताले आन्दोलनको सुरुवात गरेका छन्। मंगलबार बिहान ११ बजेदेखि सदरमुकाम मार्तडीसहित जिल्लाको पूर्वी–उत्तरी भेगमा रहेका कोल्टी, पिलिचौरलगायत स्थानमा प्रदर्शन सुरु भएको हो।

सदरमुकाम मार्तडी, बुढिगंगा नगरपालिकाको बाम्का बजार, बुढिनन्दा नगरपालिकाको कोल्टी र जगन्नाथ गाउँपालिकाको पिलिचौरलगायतका प्रमुख व्यापारिक केन्द्रहरूमा आजदेखि जेन–जी आन्दोलन हुने जनाइएको छ।

आन्दोलन चर्किएसँगै जिल्लामा सुरक्षालाई कडा पारिएको छ। युवापुस्ताले धमाधम सडकमा उत्रन थालेपछि जिल्ला प्रशासन कार्यालयले आवश्यक सतर्कता अपनाउन आग्रह गरेको छ।

काठमाडौं । खानेपानी मन्त्री प्रदीप यादवले पदबाट राजीनामा दिएका छन् । मंगलबार सामाजिक सञ्जालमार्फत उनले आफूले मन्त्री पदबाट राजीनामा दिएको घोषणा गरेका हुन् । 
उनले लेखेका छन्,‘प्रिय युवा भाइबहिनीहरु तपाइँ नै मेरो प्रथम सहयोगी र मेरो जोश र उर्जाका सुत्रधार हुनुहुन्छ । 

हिजो जेनजी युवा पुस्ताले गरेको आन्दोलनको समर्थन र सरकार र प्रशासनद्वारा गरिएको दमनको विरोध गर्दै म आफ्नो खानेपानी मन्त्रालयको मन्त्री पदबाट राजीनामा दिने घोषणा गर्दछु । हामी सबैलाई संयमता अपनाई युवा पुस्तालाई सहि मार्ग दर्शन दिन र सहयोग गर्न अपिल गर्दछु ।’

काठमाडौं । प्रधानमन्त्री केपी शर्मा ओलीले सर्वदलीय बैठक आव्हान गरेका छन् । सोमबार भएको जेनजीहरुको प्रदर्शनपछि तनावग्रस्त अवस्था भएपछि ओलीले आज साँझ ६ बजे सर्वदलीय बैठक आव्हान गरेका छन् । 

उनले उत्पन्न परिस्थितिको मूल्याङ्कन गर्न र सार्थक निस्कर्षको लागि संवद्ध पक्षसँग संवादमा रहेको पनि दाबी गरेका छन् । कुनैपनि रुपको हिंसा राष्ट्रको हितमा नहुने भन्दै शान्तिपूर्ण तथा संवादको माध्यमबाट समाधान खोज्ने उनले बताए । 

रौतहट ।  रौतहटको विभिन्न स्थानमा मंगलवारबिहानदेखि नै जेनजी युवाहरुले टायर बालेर प्रदर्शनगरेका छन ।

जेनजी युवा पुस्ताले भ्रष्टाचार सहितका बेथितीकाविरुद्ध गरिरहेको प्रदर्शनमा सोमबार भएको सरकारीदमनका विरुद्ध  प्रदर्शन गरिएको हो ।

चन्द्रपुर, गौर ,गरुडा सहितका क्षेत्रमा भेला भएकाउनीहरूले सरकार र प्रहरी प्रशासन विरुद्ध चर्कोनाराबाजी गरिरहेका छन ।

जेनजी आन्दोलनका कारण राजमार्गको यातायातपनि प्रभावित भएको छ । जेनजी प्रदर्शनलाईमध्यनजर गर्दै रौतहट प्रहरीले सुरक्षा व्यवस्था कडाबनाइएको छ ।

यहाँको मुख्य चोक चोकमा बक्लो संख्यामासुरक्षाकर्मी परिचालन गरिएको छ  । जेनजीकोप्रदर्शन छिटफुट वाहेक कुनै  किसिमको अप्रिय घटनानभएको जिल्ला प्रहरी कार्यलय रौतहटले जनाएकोछ ।

काठमाडौं । जेनजीको पदर्शनमा भएको दमनले सर्वसाधरण जनताहरु समेत आक्रोश भएका छन् । 

मंगलबार बिहानै काठमाडौंको नयाँ बानेश्वरस्थित संसद भवन बाहिर सर्वसाधरण युवाहरु आक्रोशित मुद्रामा देखिएका हुन् । 

संसद भवन बाहिर रहेका प्रेम पोखरेलले प्रतिनिधि सभामा रहेका सांसदहरुले राजिनामा दिएर सडकमा आउने र नयाँ सरकार गठनको लागि अगाडि बढ्नुपर्ने बताए । 

उनले भने, ‘संसदमा प्रतिनिधित्व गर्ने सांसदहरुले राजीनामा दिएर सडकमा आउने र नयाँ सरकार गठनको लागि अगाडि बढाउनुपर्छ ।’ उनले थप भने,‘जेनजी पुस्ताका युवाहरुलाई आज पनि माइतीघर मण्डलामा आउनको लागि आव्हान गरिसकेको छ । म नेपाली सेनाको छोरा भएको हिसाबले पनि नेपाली सेनाका साथीहरुलाई यो भन्छु कि छोराहरुको बलिदान सम्झिनु पर्यो ।’