काठमाडौं । नेपाल प्रहरीको प्रहरी महानिरीक्षकको कार्यालयले नेपालको राष्ट्रिय सुरक्षा, राष्ट्रहित र अपराध न्यूनिकरणका लागि मुलुक प्रति समर्पित हुन सम्पूर्ण नेपालीहरुलाई आव्हान गरेको छ । 

मंगलबार साझ एक विज्ञप्ति जारी गर्दै नेपाली प्रहरी प्रधान कार्यालयले जेनजीहरुको आन्दोलनले कारण अनपेक्षित एवं दुःखद घटना भएको भन्दै राष्ट्रिय सुरक्षा, राष्ट्रहित र अपराध न्यूनिकरणका लागि सबै लाग्नुपर्ने आवश्यक रहेको बताएको छ । 

विज्ञप्तिका भनिएको छ, ‘यस घडीमा प्रहरी र आम नेपाली दाजुभाइ, दिदी बहिनीहरू नेपालको राष्ट्रिय सुरक्षा, राष्ट्रहित र अपराध न्यूनिकरणका खातिर जिम्मेवारी बोधका साथ मुलुक प्रति समर्पित हुन अत्यन्त आवश्यक भएको छ ।’ 

नेपाली प्रहरीले नागरिक–प्रहरीका साझेदारीपुर्ण, शान्तिपूर्ण सहकार्यको माध्यमले घाइतेको उद्धार, उपचार, क्षतिको पुनर्निर्माण र शान्ति पुनस्र्थापनाका लागि सहयोगको अपिल समेत गरेको छ । 

‘उत्पन्न परिणाम स्वरूप परिस्थितिलाई बिग्रन नदिन र नागरिक–प्रहरीका साझेदारीपुर्ण, शान्तिपूर्ण सहकार्यको माध्यमले आन्दोलनका क्रममा भएका घाइतेको उद्धार, उपचार, क्षतिको पुनर्निर्माण एवं कुनै पनि अपराधिक समूहबाट हुने क्षतिलाई रोकी शान्ति पुनस्र्थापनार्थ निर्वाह गर्नुपर्ने राष्ट्रिय दायित्वमा एकाकार भई प्रहरीलाई सार्वजनिक शान्ति अमन चयन, अपराध नियन्त्रण र अनुसन्धान गरी कानुन कार्यान्वयनको माध्यमले कानुनी शासन स्थापित गर्ने कार्यमा सबैले साथ सहयोग प्रदान गर्नु हुन नेपाल प्रहरी सबैमा हार्दिक अनुरोध गर्दछ,’विज्ञप्तिमा भनिएको छ । 

काठमाडौं । नेपालमा जेनजी पुस्ताले आन्दोलन चर्काएपछि नेपाल–भारत सीमामा भारतीय सुरक्षा बलले सुरक्षा व्यवस्था कडा पारेको छ । उत्तराखण्ड प्रहरी मुख्यालयले मंगलबार भारत–नेपाल सीमामा सुरक्षा कडा पारेको सीएमओको प्रेस विज्ञप्तिमा उल्लेख गरिएको छ । 

पिथौरागढ प्रहरीले एसएसबीका कर्मचारीहरूसँग मिलेर काली नदी र सीमा प्रहरी चौकी क्षेत्राधिकार भित्रका अन्य संवेदनशील क्षेत्रहरूमा नियमित गस्ती र कम्बिङ अपरेसन सञ्चालन गरिरहेको छ।

त्यस्तै, पश्चिम बंगालकी मुख्यमन्त्री ममता बनर्जीले मंगलबार नेपाल सीमा नजिकका जिल्लाहरूलाई विरोध प्रदर्शनको बीचमा शान्ति कायम राख्न र ‘हस्तक्षेप’ नगर्न आग्रह गरेकी छिन्।

मिडियासँग कुरा गर्दै, मुख्यमन्त्री बनर्जीले सीमावर्ती जिल्लाहरूलाई आग्रह गर्दै भने कि यो उनीहरूको विषय होइन र यसमा निर्णय गर्ने अधिकार केवल नेपाललाई मात्र छ।

‘नेपालसँगको सीमा नजिकका हाम्रा जिल्लाहरूलाई कृपया शान्ति कायम राख्नुहोस् र यो हाम्रो मामिला नभएकोले कोही पनि कुनै समस्यामा नपरोस्। नेपाललाई आफ्नो आन्तरिक मामिलामा निर्णय गर्न दिनुहोस् । हामी उहाँहरुप्रति सद्भाव राख्छौं, यसमा हस्तक्षेप गर्नु हुँदैन,’ उनले भनिन्।

‘नेपाल मेरो देश होइन । यो विदेशी देश हो । त्यसैले म यसमा टिप्पणी गर्न सक्दिन। भारत सरकारले यसमा टिप्पणी गर्नेछ। तर यो हाम्रो छिमेकी देश हो, र नेपाल, श्रीलंका, बंगलादेश, भुटान र सबै सीमावर्ती राष्ट्रहरूलाई माया गर्छौं। यद्यपि, वर्तमान परिस्थितिलाई ध्यानमा राख्दै, भारत सरकारले जानकारी गरायो भने, प्रतिक्रिया दिन सक्छौं । अन्यथा, यो मामिलाको हेरचाह गर्ने काम भारत सरकारले नै गर्छ,’ मुख्यमन्त्री ममताले भनिन् ।

देशका विभिन्न भागहरूमा दोस्रो दिन पनि हिंसात्मक विरोध प्रदर्शन जारी रहेपछि नेपालका प्रधानमन्त्री केपी ओलीले मंगलबार राजीनामा दिएका छन्। (एएनआइ)

काठमाडौं । जेनजी आन्दोलनका प्रमुख अगुवाहरुले प्रधानमन्त्रीको राजीनामासँगै नयाँ चुनावको अल्टिमेटम सहित नागरिक सरकार गठन गर्ने माग गरेका छन् । 

 मंगलबार वक्तव्यमार्फत प्रधानमन्त्रीको राजीनामा र ताजा जनादेशका लागि म्याडेटप्राप्त अन्तरिम नागरिक सरकार गठनको माग गरेका हुन् । 

जेनजी आन्दोलनका प्रमुख अगुवाहरुलेको संयुक्त वक्तव्य मार्फत ज्यान गुमाएका १९ युवाहरूप्रति समवेदना समेत व्यक्त गरेका छन् । 

उनीहरुले नेपाल प्रहरी ०६२/६३ को जनआन्दोलनमा तत्कालीन तानाशाह सरकारभन्दा बढि क्रूर भएको र प्रहरीले अस्पतालहरूमा आक्रमण गरेको पनि बताए । 

वक्तव्यमा भनिएको छ, ‘६ घण्टाको अन्तरालमा १९ जनाको हत्या कुनैपनि सभ्य समाजमा घृणित र अस्वीकार्य छ । यो संख्या ६२/६३ को जनआन्दोलनमा तत्कालीन तानाशाह सरकारले मारेका कुल मानिसहरूभन्दा बढी हो । क्रूरता त्यहाँ रोकिएन । प्रहरी बलले साधारण नागरिकहरूको घरमा आक्रमण गरिरहेको छ, अस्पतालहरूमा आक्रमण गरिरहेको छ, मानिसहरूलाई गोली हानेको छ, परिवारहरूलाई धम्की दिइरहेको छ र हाम्रा आमाबाबुलाई पनि धम्की दिइरहेको छ । तिनीहरू हाम्रो पछि लागिरहेका छन ।’

 मागहरू यस्ता छन् :

१. हामी राज्यले सबै घाइतेहरूको उचित उपचारलाई तुरुन्तै प्राथमिकता दिन र यस आन्दोलनमा ज्यान गुमाएका प्रत्येक नागरिकलाई आधिकारिक रूपमा शहीदको रूपमा मान्यता दिन माग गर्दछौं । 

२. प्रधानमन्त्रीले तुरुन्तै राजीनामा दिनुपर्छ र नयाँ चुनावको अल्टिमेटमसहित नागरिक सरकार गठन गर्ने बाटो खोल्नुपर्छ।

३. यो सरकारले तुरुन्तै राजीनामा दिनुपर्छ।

४. प्रहरी महानिरीक्षकले राजीनामा दिनुपर्छ र जवाफदेही बनाउनुपर्छ।

५. मुलुकी फौजदारी संहिता अन्तर्गत हिजो नागरिकहरूलाई मार्ने प्रधानमन्त्री, गृहमन्त्री, महानिरीक्षक, प्रमुख जिल्ला अधिकारीहरू र प्रत्येक प्रहरी अधिकारी विरुद्ध फौजदारी अनुसन्धान सुरु गर्नुपर्छ र फौजदारी मुद्दा अगाडि बढाउनुपर्छ।

अभिजीत अधिकारी

युजन राजभण्डारी

राक्षस बम

प्रदीप ज्ञवाली

मनिष खनाल

युजन राजभण्डारी

मनिष खनाल

तनुजा पाण्डे

बिनोद देउवा

काठमाडौं । प्रख्यात नेत्रविशेषज्ञ डा. सन्दुक  सन्दुक रुईटले सडकमा परिवर्तनका लागि आन्दोलनरत युवापुस्तालाई संयमित बन्न आग्रह गरेका छन् ।

उनले एक विशेष अनुरोध जारी गर्दै आन्दोलनकारी भाइबहिनीहरूले देखाएको साहसका कारण असहिष्णु र भ्रष्ट राजनीतिक नेतृत्व पछाडि हट्न बाध्य भइसकेको उल्लेख गरे । तर यसै क्रममा सार्वजनिक सम्पत्तिमाथि आक्रमण र नोक्सानी पुर्‍याउने कार्य भने उचित नभएको बताए ।

डा.  रुईटले भने, “सार्वजनिक सम्पत्तिको संरक्षण गर्नु हरेक नागरिकको पहिलो दायित्व हो । तसर्थ, सार्वजनिक सम्पत्तिको नोक्सानी नगरौँ र गर्न नदिउँ । संयमित बनौं ।”

उनले सबै नागरिकलाई शान्तिपूर्ण ढंगले एकताबद्ध भई मुलुकलाई जोगाउन र बनाउन आह्वान गरेका छन् ।

काठमाडौं । सोमबारदेखि जारी जेनजीको आन्दोलनप्रति चलचित्रकर्मीहरुले समर्थन जनाएका छन् । मंगलबार एक संयुक्त विज्ञप्ति जारी गर्दै सरकारद्वारा गरिएको बर्बर दमन र नर संहारले चलचित्रकर्मीको हृदय छिया छिया भएको पनि जनाएका छन् । 
‘देशमा विद्यमान विकृति, विसंगति र भ्रष्टाचार उन्मुलनका लागि सरकारी तत्परताको माग राख्दै जेनजीको आव्हानमा भदौ २३ गते भएको विशेष आन्दोलन प्रति देशमा हामी चलचित्रकर्मीहरु पूर्ण समर्थन गर्दछौं। शान्तिपूर्वक भैरहेको आन्दोलन दबाउन सरकार द्वारा गरिएको बर्बर दमन र १९ जनाको ज्यान जाने गरी भएको नर संहारले हामी चलचित्रकर्मीको हृदय छिया छिया भएको छ ।
जेनजीका मागहरु सम्बोधन गरी तत्काल राष्ट्रिय निकास निकाल्न सबै पक्षसँग हामी आव्हान गर्छौ । देशको राजनीतिक रूपान्तरण को यो सम्बेदनसिल क्षणमा हामी सबैले धैर्यताका साथ देश हितमा शान्तीपूर्वक र समाधानमुखी कदम चाल्नुपर्ने आवश्यकता रहन्छ। अब सबै पक्ष बिच सरसल्लाह गरी नागरिक सरकार गठन गरेर शान्ती सुव्यवस्था कायम गरी नयाँ निर्वाचनको तयारी गर्नुपर्छ ।
साथै जेनजी आन्दोलन दबाउन भुमिका खेल्ने सम्पूर्ण पक्षलाई विशेष छानविन आयोग गठन गरेर कारवाहीको दायरामा ल्याउनुपर्छ। अहिलेको मुख्य समस्या रहेको भ्रष्टाचार रोक्न विशेष अधिकारको आयोग बनाउन तत्काल निर्णय गर्न पनि आग्रह गर्दछौ । 
जेनजीको आन्दोलन सफलताको वाटोमा अगाडी बढिसकेको हुँदा अब राष्ट्रिय सम्पत्तिहरुको तोडफोड र नास नगर्न हामी अनुरोध गर्दछौं ।
यो आन्दोलनको क्रममा सरकारले गोली हानेर मारिएका सबै युवाहरु प्रति हार्दिक श्रद्धान्जली तथा धाइनेहरुको सिध्र स्वास्थ लाभको कामना गर्दछौं ।
मनोज पण्डित
नविन सुब्वा
दयाहाङ्ग राई
निश्चल बस्नेत
अविरल थापा
साम्पिय राज तिमलसिना
रामकृष्ण पोख्रेल
गणेशदेव पाण्डे
अनुप बराल
सुरक्षा पन्न
के की अधिकारी
रिचा शर्मा
स्वस्तीमा खड्का
खगेन्द्र लामिछाने
के पी पाठक
सचिन धिमिरे
दिपेन्द्र खनाल
विनोद पौडेल
दिपक रौनियार
निरोज महर्जन
पुरेन्दु झा

काठमाडौं । सोमबारदेखि काठमाडौं लगायत मुलुकका विभिन्न भागमा भएको प्रदर्शनका क्रममा ठूलो जनधनको क्षति भएको भन्दै सुरक्षा निकायका प्रमुखहरुले संयमित हुन आग्रह गरेका छन् । 

मंगलबार एक विज्ञप्ति जारी गर्दै मुख्य सचिव, नेपाली सेना, नेपाल प्रहरी, शसस्त्र प्रहरी, गृह सचिव, अनुसन्धान विभागका प्रमुखहरुले संयुक्त अपिल गर्दै संयमित हुन आग्रह गरेका हुन् । उनीहरुल्े प्रधानमन्त्री केपी शर्मा ओलीको राजीनामा स्वीकृत भइसकेको र थप जनधनको क्षति हुन नदिन अपिल गरेको हो । 

अपिल पत्रमा भनिएको छ, ‘सम्माननीय प्रधानमन्त्रीज्यूको राजीनामा स्वीकृत समेत भएको हुँदा यस विषम परिस्थितिमा थप जनधनको क्षति हुन नदिन आम नागरिक सबैलाई संयमित हुन हार्दिक आग्रह गर्दछौं ।’

विषम परिस्थितीमा राजनीतिक संवादको माध्यमबाट यथाशक्य छिटो शान्तिपूर्ण समाधान निकाल्न सम्बद्ध सबैमा अपिल समेत गरेको हो । 

काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेलाई जेन–जी आन्दोलनकारीहरूले मंगलबार कारागारमुक्त गरेका छन्। ललितपुरस्थित नख्खु कारागारमा पुगेका प्रदर्शनकारीहरूले दबाव दिएपछि उनलाई थुनामुक्त गरिएको हो। आन्दोलनकारीहरूले कारागारभित्रै प्रवेश गरी लामिछानेलाई बाहिर निकालेका थिए।

काठमाडौं । जेनजीको आन्दोलनमा सहभागि प्रदर्शनकारीहरुले देउवा निवासमा गएर शेरबहादुर देउवा र डा.आरजु राणा देउवामाथि हातपात गरेको छ । 

मंगलबार भएको जेनजी आन्दोलनकारीहरु विहान निवासमै पुगेर देउवा दम्पत्तीमाथि नै हातपात गरेको हो । 

हिजो सोमबारदेखि चलेको जेनजी आन्दोलनले आज झन् उग्र रुप लिएको छ । उनीहरुले देउवा, ओली र प्रचण्डलगायत ठूला ठूला नेताहरुको घर र पार्टी कार्यालयमा आगजनीसहित तोडफोड पनि गरेका छन् ।

कोशी । कोशी प्रदेशको मुख्यमन्त्री कार्यालयमा आगजनी गरिएको छ । जेनजी आन्दोलनकारीले मंगलबार दिउँसो कोशी प्रदेशसभा भवनमा आगजनीपछि मुख्यमन्त्री कार्यालयमा पनि आगजनी गरेका हुन् । आन्दोलनकारीले जिल्ला प्रशासन कार्यालय मोरङमा पनि आगजनी गरेका छन् । 

जिल्ला प्रशासन कार्यालय नजिकै रहेको हुलाक निर्देशनालयमा पनि आगजनी गरेका छन् । आन्दोलनमा उत्रिएको समूहले सरकारी कार्यालय खोजीखोजी आगजनी गरिरहेका छन् ।

काठमाडौं । जेनजी आन्दोलनमा सहभागी प्रदर्शनकारीहरुले संसदभवनमा आगजनी गरेका छन् । प्रदर्शनकारी उनीहरुलाई प्रहरीले रोकेको थियो । केहीबेरमा उनीहरुले गेट अगाडि नै आगजनी गरेका हुन् । 

काठमाडौँको नयाँ बानेश्वर र माइतीघरमा जेनजीको प्रदर्शनमा सहभागी १९ जनाको मृत्यु भएपछि आन्दोलन झन् भड्किएको हो ।
जेनजीहरुले आज सिंहदरबारमा समेत आगजनी गरेका छन्  । विभिन्न राजनीतिक दलका पार्टी कार्यालय,नेताहरुको निजी घर तोडफोड गर्ने र आगजनी गर्ने काम गरिरहेका छन् ।