काठमाडौं । निवर्तमान प्रधानमन्त्री सुशीला कार्कीले नवनियुक्त प्रधानमन्त्री बालेन्द्र (बालेन) शाहलाई सामाजिक सञ्जालमार्फत हार्दिक बधाई तथा शुभकामना व्यक्त गरेकी छन् ।

जेनजी आन्दोलनपछि गठित अन्तरिम सरकारको नेतृत्व गरेकी कार्कीले ३५ वर्षीय युवालाई आफ्नो उत्तराधिकारीका रूपमा पाउँदा आफूलाई थप खुसी लागेको बताएकी हुन् ।

सामाजिक सञ्जाल फेसबुकमा उनले लेखेकी छन,‘नवनियुक्त प्रधानमन्त्री बालेन्द्र शाहलाई बधाई । ३५ वर्षीय युवालाई आफ्नो उत्तराधिकारीका रूपमा पाउँदा मलाई थप हर्षित बनाएको छजोस र होसको सन्तुलन मिलाएर जनादेशको सम्बोधन गर्न सफलता मिलोस, अपार शुभकामना ।’

काठमाडौं । नवनियुक्त प्रधानमन्त्री बालेन शाहलाई भारतीय प्रधानमन्त्री नरेन्द्र मोदीले बधाई दिएका छन् । मोदीले सामाजिक सञ्जाल एक्समार्फत बालेनलाई बधाई दिएका हुन् ।
उनले लेखेका छन्, ‘नेपालको प्रधानमन्त्रीको रूपमा पद तथा गोपनीयताको शपथ ग्रहण गर्नुभएकोमा श्री बालेन्द्र शाहलाई हार्दिक बधाई ।’

मोदीले बालेनको नियुक्तिले नेपाली जनता उनको नेतृत्वमाथि राखेको विश्वास प्रतिबिम्बित गरेको उल्लेख गरेका छन् ।
‘हाम्रा दुवै देशका जनताको पारस्परिक हितका लागि भारत–नेपाल मित्रता र सहकार्यलाई अझ उच्च स्तरमा पुर्याउन तपाईंसँग नजिकबाट सहकार्य गर्न म उत्सुक छु’, मोदीले लेखेका छन् ।
साथै, दुई देशबीचको मैत्री सम्बन्ध र सहकार्यलाई अझ उचाइमा पुर्याउन मिलेर काम गर्ने अपेक्षा व्यक्त गरिएको छ ।
सन्देशमा नेपाल–भारत सम्बन्धलाई दुवै देशका जनताको पारस्परिक हितका लागि थप सुदृढ बनाउने प्रतिबद्धता समेत जनाइएको छ ।

जनकपुर । राष्ट्रिय स्वतन्त्र पार्टी (रास्वपा)को संसदीय दलका नेता बालेन्द्र साह (बालेन)को महोत्तरीस्थित पुर्खौली गाउँ एकडारामा आज(शुक्रबार)उत्सव मनाइने भएको छ ।

बालेनले आज प्रधानमन्त्रीको सपथ ग्रहण गर्ने भएको र यस अवसरमा बालेनको गाउँवासीले खुसीयाली मनाउने तयारी गरेका छन् । दुई दिन पहिलादेखि नै एकडारा गाउँपालिकाका गाउँवासीहरु आजको दिनलाई भव्य उत्सवका रुपमा मनाउन जुटेका छन् ।

कसैले मिठाईका परिकार तयार गरेका छन् भने कसैले पटका र आतिसवाजीको तयारी गरेका छन् । बालेन प्रधानमन्त्री हुने भएपछि सम्पूर्ण एकडारावासी हर्सित छन् ।

एकडारा गाउँका बच्चादेखि वृद्धसम्म सबै खुसी छन् । स्थानीय सुशीला देवीका अनुसार आज उनले गाउँमा रंग अबिर खेल्ने र बेलुकीपख हरेक घर एवम चोकमा दियो बाल्ने बताइन् ।

अर्का स्थानीयवासी अरुण कुमार साहका अनुसार बालेनले विगतदेखि नै गर्दै आएको कामले एकडारा गाउँको नाम देशभरि चिनाएको छ । बालेनले हालसम्म आफ्नो गाउँको लागि केही नगरेपनि उनको बुबा, हजुरबुबाले गाउँको विकासका लागि उल्लेख्य कामहरु गरेका छन् । बालेनले गाउँ आउने वाचा गरेको र एकडारा गाउँको लागि पनि पक्कै नै विकासका कामहरु गर्नेमा विश्वस्त रहेको साहले बताए ।

एकडारा गाउँको लागि आजको दिन गर्वको दिन रहेको स्थानीयवासीहरु बताउँछन् । एकडारा महोत्तरीको सदरमुकाम जलेश्वर हुँदै बर्दिवाससम्म पुग्ने मुख्य वैकल्पिक बाटो भएकाले, आज यहाँ हुँदै आवतजावत गर्नेहरुलाई लड्डु खुवाउने स्थानीयहरुको भनाइ छ ।

उनीहरुले आज गाउँभरि दिप प्रज्ज्वलन गर्ने बताएका छन् । बालेनले आज प्रधानमन्त्रीको सपथ ग्रहण तथा पदभारगर्ने भएका छन् । हालै सम्पन्न प्रतिनिधिसभा सदस्यको निर्वाचनमा बालेनले झापाबाट नेकपा एमालेका केपी शर्मा ओलीलाई उनकै क्षेत्रबाट हराएर जित हासिल गरेका थिए ।

सर्लाही । महोत्तरीमा सडक विस्तारको क्रममा ढलेको रुखले पत्रकार प्रेमनाथ पौडेल र उनका दाजु घाइते भएका छन्। नेपाल पत्रकार महासंघ सर्लाही शाखाले यस घटनालाई सडक विभागको लापरवाहीका कारण भएको ठहर गर्दै घाइते पत्रकार दाजुभाइको उपचारको पूर्ण व्यवस्था गर्न जोडदार माग गरेको छ ।

महासंघले बिहिबार जारी गरेको प्रेस विज्ञप्तिमा घाइते पौडेल दाजुभाइको सम्पूर्ण उपचार र उचित क्षतिपूर्ति सुनिश्चित गर्न प्रशासनसँग आग्रह गरिएको छ ।
हरिवन नगरपालिका–४ निवासी पौडेल दाजुभाइ बुधबार सर्लाहीबाट बर्दिवासतर्फ जाँदै गर्दा महोत्तरीको लक्ष्मीनियाँ चोक नजिक पूर्व–पश्चिम लोकमार्गमा दुर्घटनामा परेका थिए। सडक विभागले काट्दै गरेको रुख अचानक ढलेर उनीहरूको सवार प्रदेश २–०३–०१८ प ५४२९ नम्बरको मोटरसाइकलमाथि खस्दा दुवै जना सख्त घाइते भएका हुन् ।

तत्काल सडक विभागका कामदारहरूले उद्धार गरी बर्दिवासस्थित जनसेवा अस्पताल पु¥याएका थिए। प्रेस विज्ञप्तिअनुसार, पौडेलको दाहिने कुहिनामा गहिरो चोट लागेको र कम्मरमुनी दाहिने खुट्टाको हड्डी भाँचिएको छ । प्रारम्भिक उपचारपछि उनलाई थप उपचारका लागि काठमाडौं लगिएको छ।

महासंघले घटनामा सडक विभागको पूर्ण जिम्मेवारी रहेको भन्दै दोषी कर्मचारी र कामदारमाथि छानबिन गरी कारबाही गर्न प्रशासनसँग माग गरेको छ । साथै, घाइते पत्रकार दाजुभाइको शीघ्र स्वास्थ्यलाभको कामना व्यक्त गरिएको छ ।

काठमाडौं । राष्ट्रपति रामचन्द्र पौडेलले राष्ट्रिय स्वतन्त्र पार्टीका वरिष्ठ नेता एवं प्रतिनिधि सभाका सदस्य बालेन्द्र शाह (बालेन)लाई प्रधानमन्त्री पदमा नियुक्त गरेका छन् ।

शुक्रबार उनले नेपालको संविधानको धारा ७६ (उपधारा १) बमोजिम प्रधानमन्त्री पदमा नियुक्त गरेका हुन् ।

राष्ट्रपति भवन, महाराजगञ्जबाट जारी विज्ञप्तिमा भनिएको् छ, ‘सम्माननीय राष्ट्रपति श्री रामचन्द्र पौडेलज्यूले नेपालको संविधानको धारा ७६ को उपधारा (१) बमोजिम प्रतिनिधि सभाका माननीय सदस्य श्री वालेन्द्र शाहज्यूलाई नेपालको प्रधानमन्त्री पदमा नियुक्त गर्नु भएको छ ।’

उनी नेपालको ४३औँ प्रधानमन्त्री बनेका हुन् । शाहको नियुक्तिसँगै मन्त्रिपरिषद् विस्तारको तयारी पनि भइरहेको छ ।

आजै दिउँसो १२ः३४ बजे उनले पद तथा गोपनीयताको शपथ लिँदै छन् । राष्ट्रपति पौडेलले शीतलनिवासमा एक समारोहबीच उनलाई शपथ गराउनेछन् ।

संविधानको धारा ७६ को १ अनुसार प्रतिनिधि सभामा बहुमत प्राप्त दलको नेताको रुपमा उनलाई प्रधानमन्त्री नियुक्त गरिएको हो ।
नेपालको संविधान २०७२ जारी भएपछि यो धाराको प्रयोग गरी प्रधानमन्त्री नियुक्त भएको पहिलोपटक हो ।

काठमाडौं । आज राष्ट्रपति रामचन्द्र पौडेलले शीतल निवासमा राष्ट्रिय स्वतन्त्र पार्टीका वरिष्ठ नेता बालेन्द्र शाह (बालेन) लाई प्रधानमन्त्री पदको शपथ गराउदै छन् । शपथअघि उनलाई औपचारिक रूपमा प्रधानमन्त्रीमा नियुक्त गरिनेछ ।

जनताको प्रत्यक्ष समर्थनबाट उदाएको शक्तिका रूपमा उभिएको राष्ट्रिय स्वतन्त्र पार्टीले सरकारको नेतृत्व सम्हाल्दै छ ।

नेपालको संविधानको धारा ७६ (१) अनुसार स्पष्ट बहुमतसहित एकल सरकार गठन हुन लागेको हो, जसले लामो समयदेखि चल्दै आएको गठबन्धन राजनीतिको अभ्यासलाई चुनौती दिएको विश्लेषण भइरहेको छ ।

गत प्रतिनिधिसभा निर्वाचनमा राष्ट्रिय स्वतन्त्र पार्टीले १८२ सिट जित्दै अप्रत्याशित बहुमत हासिल गरेको थियो। त्यसपछि बिहीबार मात्रै शाहलाई संसदीय दलको नेता चयन गरिएको थियो, जसले उनको प्रधानमन्त्री बन्ने बाटो खुला गरेको हो।

शपथ ग्रहण समारोहमा विभिन्न राजनीतिक दल, कूटनीतिक नियोगका प्रतिनिधि, नागरिक समाज तथा उच्च सरकारी अधिकारीहरूको उपस्थिति रहनेछ । प्रधानमन्त्रीसँगै मन्त्रीहरूको पनि शपथ गराइने कार्यक्रम रहेको राष्ट्रपति कार्यालयले जनाएको छ ।

काठमाडौं । राष्ट्रिय स्वतन्त्र पार्टीको संसदीय दलको नेतामा बालेन्द्र शाह चयन भएका छन् । विहीबार पार्टी कार्यालयमा बसेको दलको बैठकले शाहलाई नेता चयन गरेको हो ।

संसदीय दल गठन सम्बन्धी प्रस्ताव पार्टी सभापति रवि लामिछानेद्वारा संसदीय दलमा प्रस्तुत गरिएको थियो ।

केन्द्रीय समितिको निर्णय अनुसार वरिष्ठ नेता बालेन्द्र शाह संसदीय दलको नेता र प्रधानमन्त्रीको उम्मेदवारका रूपमा चयन भएको सो अवसरमा जानकारी गराइयो । शाहलाई दलको नेताका रुपमा गरिएको प्रस्ताव सर्वसम्मत रूपमा पारित भएको प्रवक्ता मनिष झाले जानकारी दिए ।

‘राष्ट्रिय स्वतन्त्र पार्टीको वरिष्ठ नेता बालेन्द्र शाह राष्ट्रिय स्वतन्त्र पार्टीको संसदीय दलको नेता तथा प्रधानमन्त्रीको उम्मेदवारको रूपमा केन्द्रीय समिति तथा संसदीय दलको नेताको रूपमा राष्ट्रिय स्वतन्त्र पार्टीको सभापतिद्वारा प्रस्ताव सर्वसम्मत रूपमा पारित भएको छ,’ झाले जानकारी दिए ।

काठमाडौं । श्रम संस्कृति पार्टीका अध्यक्ष हर्कराज राई (हर्क साम्पाङ) ले सरकारलाई सहयोग गर्ने तर प्रतिपक्षमै रहेर प्रश्न उठाउने बताएका छन् । सिंहदरबारस्थित संसद् भवन परिसरमा सपथ ग्रहणका लागि पुगेका राईले सञ्चारकर्मीसँग कुराकानी गर्दै आफूहरू देशको हितमा सरकारलाई सहयोग गर्ने पक्षमा रहेको स्पष्ट पारे।

उनले भने, “हामी प्रतिपक्षमा बसेर सरकारलाई प्रश्न पनि गर्छौं र आवश्यक सहयोग पनि गर्छौं। सरकारले गर्नुपर्ने काममा प्रतिपक्षकै भूमिकाबाट साथ दिनेछौं।”

अध्यक्ष राईले राजनीतिमा लाग्ने व्यक्तिले सर्वोच्च पदमा पुग्ने लक्ष्य राख्नुपर्ने बताउँदै आफूलाई भावी प्रधानमन्त्रीको रूपमा अघि सारे।

उनले जनताको निर्णयलाई सम्मानपूर्वक स्वीकार गर्नुपर्नेमा जोड दिँदै भने, “जनताले जे निर्णय गर्छन्, त्यसलाई सहर्ष स्वीकार र सम्मान गर्नुपर्छ।”

काठमाडौं । प्रतिनिधिसभाका नवनिर्वाचित २७४ जना सदस्यहरुले आज पद तथा गोपनीयताको शपथ लिएका छन् । बिहीबार प्रतिनिधिसभाका ज्येष्ठ सदस्य अर्जुननरसिंह केसीले नवनिर्वाचित २७४ जना सदस्यहरुलाई शपथ गराएका हुन् ।

नवनिर्वाचित सासंदहरु थरीथरी भेषभूषामामा शपथ लिन सिंहदरबारस्थित संसद् भवनको हलमा पुगेका थिए ।
प्रतिनिधि सभा सदस्य निर्वाचन ऐन, २०७४ को दफा ७५ अनुसार सदस्यले प्रतिनिधिसभा वा त्यसको कुनै समितिको बैठकमा भाग लिनुअघि प्रतिनिधिसभाको अध्यक्षता गर्ने व्यक्तिसमक्ष शपथ लिनुपर्ने व्यवस्था रहेको छ

एजेन्सी । चीनले बिहीबार लङ मार्च–२डी क्यारियर रकेट प्रक्षेपण गरेको छ । जसले दुई नयाँ उपग्रहहरू अन्तरिक्षमा राख्न सफल भएको छ । 

रकेटले उत्तरी चीनको शान्सी प्रान्तको ताइयुआन उपग्रह प्रक्षेपण केन्द्रबाट बिहान ६ः५१ बजे (बेइजिङ समय) प्रक्षेपण गरेको हो । सिवेई गाओजिङ–२ ०५ र सिवेई गाओजिङ–२ ०६ उपग्रहहरूको जोडीलाई तिनीहरूको पूर्वनिर्धारित कक्षमा पठाएको हो । यो लङ मार्च शृङ्खलाका रकेटहरूको ६३४ औं उडान मिसन थियो। (सीसीटीभीप्लस)