मुगु । टाउकोमा क्यान्सर भएर लाम्रो समयदेखि पीडा भोग्दै आएका छायाँनाथ रारा नगरपालिका—१० तल्लेख गाउँका राम बहादुर बिकको गत चैत्रमा उपचारकै क्रममा मृत्यु भएपछि उनकी श्रीमतीसहित चार छोरीको बिचल्ली भएको छ ।

श्रीमान बचाउनका लागि उपचार गर्दागर्दै चारपाँच लाख ऋण लागेको र आय आर्जन गर्ने मुल व्यक्ति नै नभएपछि परिवार चलाउनै धौ धौ परिरहेको असौजी बिकले बताइन् । 

‘कान्छी छोरी गर्भमै हुँदा श्रीमानको मृत्यु भयो । उनी अहिले चार महिनाको छिन । जेठी छोरी पाँच बर्ष, माइली तीन वर्ष र साहिली दुई बर्ष पुगिन् । उनीहरुको लालनपालनमै समस्या भइरहेको छ,’विकले अगाडि भनिन्,‘श्रीमानको टाउकोमा सानो चोट लागेपछि बिस्तारै ठूलो घाउका रुपमा फैलियो । पछि क्यान्सर भएको थाहा भयो । उपचार गर्दागर्दै सबै सम्पत्ति सकियो । ऋण लाग्यो तर उहाँलाई बचाउन सकिएन् । चारपाँच लाख रुपैंयाँ ऋण लाग्यो ।’

छोरीहरुलाई अलपत्र राखेर काम गर्न जानपनि समस्या भइरहेको उनले सुनाइन् । ‘काम गर्न जान नपाएपछि बिहान–बेलुका छाक टार्न, छोरीहरुका लागि तत्ताकपडा किन्न नसक्दा पिरलो परिरहेको छ । श्रीमानले मजदुरी गरेरै हामीलाई पाल्नु भएको थियो । अहिले अवस्था विग्रिएको छ,’२५ वर्षीया विकले भनिन् ।

सुत्केरी हुँदा राम्रो स्याहार नहुँदा हाल आँखा र खुट्टा सुनिने समस्या रहेको सुनाउँदै उनले भनिन्,‘छोरीहरु विद्यालय जान खोज्छन्, अरु साथी स्कुल गएको देखेपछि जाने इच्छा गर्छन् । तर लुक, किताब, कापी नहुँदा घरमै बस्न बाध्य छन् ।’

छायाँनाथ रारा नरपालिका—१० का वडा अध्यक्ष हस्त बहादुर बुढाले विक परिवारको अवस्था नाजुक भएकाले सहयोगका लागि अपिल गरे । ‘रामबहादुर विकलाई बचाउनका लागि धेरै सहयोग गरियो । तर बचाउन सकिएन् । अहिले छोरी र श्रीमतीलाई आवश्यक सहयोग जुटाउन मुस्किल भइरहेको छ । सबैले सहयोग गरिदिए उनीहरुको भविष्य राम्रो हुनेथियो,’उनले भने । 

काठमाडौं । चीन भ्रमणमा रहेका प्रधानमन्त्री केपी शर्मा ओलीले आइतबार तियानजिनस्थित चाउ इन्लाई र तेङ यिङचाओ स्मृति संग्रहालयको अवलोकन गरेका छन् ।

चिनियाँ राष्ट्रपति सी चिनफिङको मैत्रीपूर्ण निमन्त्रणामा शाङ्घाई सहयोग संगठन (एससीओ) को शिखर सम्मेलनमा सहभागी हुन शनिबार बिहानै तियानजिन प्रस्थान गरेका प्रधानमन्त्री ओलीले भ्रमणको क्रममा स्मृति संग्रहालयको अवलोकन गरेका हुन् ।

प्रधानमन्त्री ओलीले सोमबार (भदौ १६) तियानजिनमा हुने ‘एससीओ प्लस शिखर सम्मेलन’ मा सम्बोधन गर्ने कार्यक्रम रहेको छ। साथै उनले शिखर सम्मेलनको ‘साइडलाइन’ मा विभिन्न विश्व नेताहरूसँग भेटघाट गर्ने कार्यतालिका समेत रहेको छ ।

काठमाडौं । प्रधानमन्त्री केपी शर्मा ओली र चिनियाँ राष्ट्रपति सी चिनफिङबीच भेटवार्ता भएको छ ।

शाङ्घाई सहयोग संगठन (एससिओ)को शिखर सम्मेलनमा भाग लिन आज चीनको थियानजिन शहर पुगेका ओली र सीबीच चीनको थियानजिन अतिथि गृहमा भेटवार्ता भएको हो । 

भेटमा दुई पक्षीय हितका बारेमा कुराकानी भएको छ । चीनका राष्ट्रपति सी चिनफिङको मैत्रीपूर्ण निमन्त्रणामा नेपाली प्रतिनिधिमण्डलको नेतृत्व गर्दै प्रधानमन्त्री ओली स्थानीय समय अनुसार दिउँसो ३ः१५ बजे हिमालय एयरलाइन्सनको विमानमार्फत थियानजिन विनहाइ अन्तर्राष्ट्रिय विमानस्थलमा पुगेका थिए । 

काठमाडौं । काठमाडौं महानगरपालिकाका प्रमुख बालेन्द्र शाह (बालेन) ले चीन भ्रमणमा गएका प्रधानमन्त्री केपी शर्मा ओलीलाई लिपुलेक अतिक्रमणबारे कुरा उठाउन आग्रह गरेका छन् । 

शनिबार प्रधानमन्त्री ओलीसहितको प्रतिनिधिमण्डल चीनतर्फ लागेपछि सामाजिक सञ्जालमार्फत उनले नेपालको लिपुलेक नाकाबाट व्यापार पुनः सञ्चालन गर्ने भारत–चीनको सहमतिले नेपालको सार्वभौमिकतामाथि अतिक्रमण गरेको भन्दै यसबारे कुरा उठाउन आग्रह गरेका हुन् । 

उनले लेखेका छन्, ‘चीन भ्रमणको शुभकामना प्रधानमन्त्रीज्यू । नेपालको लिपुलेक नाकाबाट व्यापार पुनः सञ्चालन गर्ने भारत–चीनको सहमतिले हाम्रो सार्वभौमिकतामाथिको अतिक्रमण गरेको छ, त्यो हाम्रो नै हो भन्ने कुरा चीनलाई सम्झाउन नबिर्सनु होला । अल द बेस्ट हामीलाई तपाईंमाथि पूर्ण विश्वास छ ।’

उनले ओलीलाई अल द बेस्टको साथै यसबारे कुरा उठाउने पूर्ण विश्वास रहेको पनि लेखेका छन् । 

काठमाडौं । नेपाल विद्युत प्राधिकरणका निवर्तमान कार्यकारी निर्देशक कुलमान घिसिङले उज्यालो नेपाल अभियानले सामाजिक, आर्थिक र राजनीतिक क्षेत्रमा रुपान्तरण ल्याउने बताएका छन् ।

बेलायत भ्रमणबाट फर्किने क्रममा शनिबार त्रिभुवन अन्तराष्ट्रिय विमानस्थलमा पत्रकारहरुसँग कुरा गर्दै उनले यस्तो बताएका हुन् । पत्रकारहरुसँग कुरा गर्दै उनले भने, ‘सामाजिक, आर्थिक र राजनीतिकलगायत समग्र क्षेत्रलाई रुपान्तरणको लागि यो अभियानले एउटा जागरण ल्याउछ र युवा शक्तिलाई सबै क्षेत्रमा नेतृत्व लिनको लागि प्रेरित गराउँछ ।’

‘देशभित्र एउटा आत्म निर्भर अर्थतन्त्र बनाउँदै, देशभित्र रोजगारी, सुशासन कसरी सिर्जना गर्ने भन्ने विषयमा पनि यसले जागरण ल्याउछ र देशभित्र नीति र नेतृत्व सहि हुनुपर्छ र त्यसको लागि पनि यसले एउटा दबाब सिर्जना गर्छ यो अभियान एउटा राष्ट्रिय अभियानको रुपमा अगाडि बढ्नु पर्छ भनेर हामी लागेका छौ । यसमा यो भ्रमणहरुले धेरै महत्वपूर्ण भूमिकाहरु खेल्ने उनको भनाई छ ।

उनले भ्रमणका क्रममा जुन जुन व्यक्ति र संस्थाहरुसँग अन्तरक्रियाहरु भयो त्यो एकदमै फलदायी र सफलतापूर्वक भएको बताए । उक्त भ्रमणले आगामी दिनमा आफ्ना पाइला अगाडि बढ्नका लागि एकदमै महत्वपूर्ण भूमिका खेल्ने उनको विश्वास छ ।

उनले भने, ‘म विद्युत प्राधिकरणबाट बाहिर निस्किएपछि, मलाई विभिन्न संघ संस्थाहरुले निमन्त्रणा गर्नु भएको थियो । त्यो निमन्त्रणालाई स्वीकार गरेर पनि गएको हुँ । त्यो क्रममा जुन जुन व्यक्ति र संस्थाहरुसँग मेरो अन्तरक्रियाहरु भयो त्यो एकदमै फलदायी, सफल र राम्रो भएको छ । यसले आगामी दिनमा मेरो पाइला अगाडि बढ्नको लागि पनि एकदमै महत्वपूर्ण भूमिका खेल्छ भन्ने लाग्छ । यो उज्यालो नेपाल अभियान भनेर हामीले जुन भन्ने गरेका छौ । यसबारे देश विदेशमा रहेका सबैलाई स्पष्ट पार्नको लागि पनि यो भ्रमण फलदायी रह्यो ।’ 

यस्तै, उनले सामाजिक, आर्थिक र राजनीतिकलगायत समग्र क्षेत्रलाई रुपान्तरणको लागि यो अभियानले एउटा जागरण ल्याउने भन्दै युवा शक्तिलाई सबै क्षेत्रमा नेतृत्व लिनको लागि पनि यसले प्रेरित गर्ने बताए ।

उनी अमेरिकाको ६ वटा स्टेटमा करिब १२ वटा कार्यक्रमहरुमा सहभागि हुनुको साथै उज्यालो नेपालसँग सम्बन्धित विषयहरुमा धेरै नै राम्रो सुझाव, छलफल र बहस भएको उनको भनाई छ । 

पत्रकारले रुपन्देहीको चुनाव बारे प्रश्न गर्दा उनले एउटा ठाँउको लागि भनेर अभियान सुरु नगरेको भन्दै रुपन्देहीको विषयलाई त्यती महत्व नदिएको बताए । बाहिर रहेका युवाहरुको बुझाई भनेको नेपाल रुपान्तरण हुनुपर्छ र नेपालमा अब समृद्धि आउनु पर्छ भन्ने हो ।

रौतहट । पूर्वराष्ट्रपति विद्यादेवी भण्डारीलाई बाराको सिमरा विमानस्थलमा भव्य स्वागत गरिएको छ । वीरगञ्ज उद्योग वाणिज्य सङ्घद्वारा आयोजित ‘वृहत् महिला सम्मेलन–२०८२’ मा प्रमुख अतिथिका रूपमा सहभागी हुन शनिवार काठमाडौँबाट सिमरा विमानस्थल आएकी हुन् । 

पूर्वराष्ट्रपति भण्डारीलाई नेकपा एमालेका नेताहरूले स्वागत गरेका थिए । एमाले स्थायी कमिटी सदस्य  मुकुन्द न्यौपाने, पोलिटब्युरो सदस्य पुरुषोत्तम पौडेल, केन्द्रीय सदस्यहरू केदार न्यौपाने, अरविन्द सिंह, प्रदेश सचिव मनोज पौडेल, सचिवालय सदस्य जय प्रकाश थारु लगायतका नेताहरुले ५१ किलोको माला लगाइ स्वागत गरेका हुन् । 

पोलिटब्युरो सदस्य तथा पूर्वमन्त्री पुरुषोत्तम पौडेलले भण्डारीलाई ‘गणतन्त्रको गौरव’ भन्दै  स्वागत र सम्मान गरिएको बताए ।

उनले भण्डारीको राष्ट्रपति कार्यकाल र एमाले नेतृत्वमा रहँदा  खेलेको भूमिकाको प्रशंसा समेत गरे । पार्टी नेतृत्वले भण्डारीलाई औपचारिक कार्यक्रममा सहभागी नहुन निर्देशन दिएको भए पनि  नेता–कार्यकर्ता स्वागतमा सिमरा पुगेका हुन् ।

काठमाडौं । जल तथा मौसम पूर्वानुमान महाशाखाका अनुसार हाल मनसुनको न्यून चापीय रेखा पूर्वमा सरदर स्थानभन्दा दक्षिणतर्फ तथा पश्चिममा सरदर स्थानको आसपासमा अवस्थित रहेको छ । 

जसका कारण देशभर साधारणतया मौसम बदली रहेको छ भने कोशी प्रदेशको तराईदेखि बागमती, गण्डकी, लुम्बिनी र सुदूरपश्चिम प्रदेशलगायत बाँकी प्रदेशका थोरै स्थानहरूमा हल्का देखि मध्यम वर्षा भइरहेको छ ।

महाशाखाका अनुसार आज दिउँसो देशभर साधारणतया बदली रही देशका पहाडी भू–भागका केही स्थानहरू र बाँकी तराई भू–भागका थोरै स्थानहरूमा मध्यम वर्षाको सम्भावना रहेको छ । कोशी, गण्डकी र सुदूरपश्चिम प्रदेशका पहाडी भू–भागका थोरै स्थानमा भारी वर्षाको सम्भावना रहेको छ ।

आज राति भने देशभर साधारणतया बदली रही कोशी, गण्डकी र सुदूरपश्चिम प्रदेशलगायत देशका बाँकी पहाडी भू–भागका केही स्थानहरूमा तथा बाँकी भू–भागका थोरै स्थानहरूमा मध्यम वर्षाको सम्भावना रहेको छ भने कोशी प्रदेश र सुदूरपश्चिम प्रदेशको पहाडी भू–भागका एक दुई स्थानमा भारी वर्षाको सम्भावना रहेको महाशाखाले जनाएको छ ।

काठमाडौं । सरकारले प्रहरी महानिरीक्षक (आईजीपी) मा एआईजी चन्द्रकुवेर खापुङ नियुक्त गरेको छ । शुक्रबार बालुवाटारमा बसेको मन्त्रिपरिषद् बैठकले उनलाई आईजीपी बनाउने निर्णय गरेको हो । 

वर्तमान आईजीपी दीपक थापा यही भदौ १७ गते अवकाशमा जाँदैछन् । भदौ १९ गतेदेखि लागू हुनेगरी नेपाल प्रहरीका ३२औँ महानिरीक्षकमा खापुङ नियुक्त भएका हुन्।

काठमाडौं । प्रधानमन्त्री केपी शर्मा ओलीले आज प्रतिनिधिसभा बैठकमा विशेष सम्बोधन गर्दै छन् ।

सभामुख देवराज घिमिरेका अनुसार उत्तरी छिमेकी मुलुक चीन भ्रमणमा जानु अघि त्यसबारेमा प्रधानमन्त्री ओलीले सो भ्रमणका बारेमा सदनमा जानकारी गराउने छन् । 

प्रधानमन्त्री ओली भोलि शनिबार चीन भ्रमणमा जाँदैछन् ।

काठमाडौं । जल तथा मौसम विज्ञान विभागको मौसम पूर्वानुमान महाशाखाले हाल मनसुनको न्यूनचापीय रेखा सरदर स्थानको आसपासमा रहेको जनाएको छ । साथै बंगालको खाडीबाट मनसुनी हावाको प्रभाव केही बढेको विभागले जानकारी दिएको छ ।

महाशाखाका अनुसार शुक्रबार बिहान देशभर आंशिकदेखि साधारणतया बदलीको अवस्था रहेको छ । अधिकांश भूभागमा वर्षा भइरहेको छ भने कोशी र लुम्बिनी प्रदेशका केही स्थानमा भारी वर्षा समेत भएको छ ।

साँझ र राति पनि देशैभर आंशिकदेखि साधारणतया बदली रहने पूर्वानुमान गरिएको छ । कोशी र सुदूरपश्चिम प्रदेशका एक÷दुई स्थानमा भने भारी वर्षा हुने सम्भावना रहेको विभागले जनाएको छ ।