मुगु । सातौं जुम्ला–रारा अल्ट्रा म्याराथन सुरु भएको छ । प्रतियोगितामा ५ किलोमिटर, १० किलोमिटर र ५४ किलोमिटर दूरीका दौड समावेश गरिएको छ ।

गत वर्षसम्म ५१ किलोमिटर दूरीमा सञ्चालन हुँदै आएको अल्ट्रा म्याराथन यस वर्ष ५४ किलोमिटर कायम गरिएको आयोजकले जनाएको छ । कर्णाली स्पोट्र्स क्लबका अनुसार ५ किलोमिटरतर्फ ६ सय ५० भन्दा बढी, १० किलोमिटरतर्फ २ सयभन्दा बढी तथा ५४ किलोमिटर अल्ट्रातर्फ १ सय ३५ जना खेलाडीले नाम दर्ता गराएका थिए । यस वर्षको प्रतियोगितामा भारत लगायत विभिन्न देशका खेलाडीहरूको सहभागिता रहेको छ । ५४ किलोमिटर अल्ट्रा दौडतर्फ ६० जना खेलाडी प्रत्यक्ष प्रतिस्पर्धामा सहभागी भएका छन् ।

प्रतियोगितामा महिला तथा पुरुषतर्फ प्रथम, द्वितीय, तृतीय, सान्त्वना र पाँचौँ स्थान हासिल गर्ने खेलाडीलाई क्रमशः नगद १ लाख रुपैयाँ, ७५ हजार रुपैयाँ, ५० हजार रुपैयाँ, २०÷२० हजार रुपैयाँसहित ट्रफी र प्रमाणपत्र प्रदान गरिने कर्णाली स्पोट्र्स क्लबका अध्यक्ष शाहीले जानकारी दिए ।

काठमाडौं । इन्डियन प्रिमियर लिग (आईपीएल) क्रिकेटमा कोलकाता नाइट राइडर्सले सहज जित निकालेको छ । शुक्रबार राति दिल्लीमा सम्पन्न खेलमा दिल्ली क्यापिटल्सलाई ८ विकेटले हराउँदै कोलकाता विजयी भएको हो ।

दिल्लीले दिएको १ सय ४३ रनको लक्ष्य कोलकाताले १४ ओभर २ बलमा २ विकेट गुमाएर पूरा गरेको थियो । यसअघि टस हारेर पहिले ब्याटिङ गरेको दिल्लीले निर्धारित २० ओभरमा ८ विकेटको क्षतिमा १ सय ४२ रन बनाएको थियो ।

कोलकाताका फिन एलेनले सर्वाधिक एक सय रनको शतकीय पारी खेले । यस्तै, क्यामरुन ग्रीनले ३३, अजिन्क्या रहाणेले १३ रन जोडे । दिल्लीका अक्षर पटेले १ विकेट लिए । दिल्लीका पथुम निसान्काले ५० रनको अर्धशतकीय इनिङ खेले । यस्तै, आशुतोष शर्माले ३९ र अक्षर पटेलले ११ रनको योगदान दिए । कोलकाताका कार्तिक त्यागी र अनुकूल रोयले २–२ तथा क्यामरुन ग्रीनले १ विकेट लिए । 

यो जिततसँगै कोलकाता नाइट राइडर्स १० खेलबाट ९ अंकसहित तालिकाको सातौँ स्थानमा छ । एक खेल बढी खेलेको दिल्ली क्यापिटल्स ८ अंकका साथ आठौँ स्थानमा छ ।

काठमाडौं । नेपालको प्रमुख घरेलु क्रिकेट लिग कोशी प्राइड लिग (केपीएल) सिजन ३ आगामी जेठ ९ गते (मे २३) देखि सुरु हुने भएको छ ।
आइतबार आयोजित पत्रकार सम्मेलनमार्फत आयोजकले प्रतियोगिताको औपचारिक उद्घाटन मिति सार्वजनिक गरेको हो ।

यसअघि जेठ २६ गते प्रतियोगिताको ट्रफी सार्वजनिक (ट्रफी रिभिल) गरिने जानकारी पनि दिइएको छ ।
कार्यक्रममा बोल्दै नेपाल क्रिकेट संघ (क्यान) का सचिव पारस खड्काले प्रतियोगिताले नेपाली क्रिकेटको विकासमा महत्वपूर्ण भूमिका खेल्ने विश्वास व्यक्त गरे ।

उनले कोशी प्राइड लिगजस्ता प्रतियोगिताले खेलाडीहरूलाई व्यावसायिक प्लेटफर्म प्रदान गर्ने उल्लेख गर्दै स्थानीय, प्रादेशिक र राष्ट्रिय स्तरका क्रिकेट संरचनाबीच सहकार्य आवश्यक रहेको बताए ।

खड्काले निजी क्षेत्रको लगानी, स्थानीय समुदायको साथ र क्रिकेटप्रतिको बढ्दो आकर्षणले यस्ता प्रतियोगितालाई सफल बनाउने मुख्य आधार भएको धारणा राखे ।

उनले देशभर क्रिकेटप्रतिको क्रेज बढ्दो क्रममा रहेको उल्लेख गर्दै यस्ता लिगहरूले नयाँ प्रतिभा उत्पादन र खेलको व्यावसायिकता विस्तारमा टेवा पुर्याउने बताए ।

प्रतियोगिता आयोजना गर्न विभिन्न चुनौती र समय व्यवस्थापनका बाबजुद आयोजक, जिल्ला तथा प्रदेश क्रिकेट संघ, प्रायोजक र सरोकारवालाको सहकार्यले लिग सम्भव भएको आयोजकले जनाएको छ ।

कोशी प्राइड लिगलाई नेपालको प्रमुख क्रिकेट प्रतियोगितामध्ये एक बनाउने लक्ष्यसहित अघि बढाइएको आयोजकको भनाइ छ । प्रतियोगितामा सहभागी टिम, खेलाडी र समर्थकको उत्साहले यसलाई अझ भव्य बनाउने विश्वास लिइएको छ ।

आयोजकले प्रतियोगिता सफलतापूर्वक सम्पन्न गर्न सहयोग गर्न आव्हान गर्दै नेपाली क्रिकेटको विकासका लागि यस्ता पहलहरू निरन्तर रहने जनाएको छ ।

एजेन्सी । सन् २०२६ को जुनमा आयोजना हुने फिफा विश्वकपक फुटबलका लागि चीनमा विश्वकप सम्बन्धी सामग्रीहरुको उत्पादनलाई तिब्रता दिइएको छ ।
पूर्वी चीनको यिवु शहरका व्यापारीहरूले प्रतियोगिता अगाडि विश्वकपका सामानहरूको अर्डर भर्न व्यस्त देखिन्छन् । बलदेखि जर्सीसम्मका सामग्रीहरुको अन्तर्राष्ट्रिय व्यापार बजारको प्रवद्र्धनमा व्यवसायीहरुलाई भ्याइनभ्याइ छ ।

यस वर्षको प्रतियोगिता मेक्सिको, अमेरिका र क्यानडा तीन देशहरूमा खेलिने तथ्यले व्यापार बढ्ने देखिन्छ । ‘प्रतियोगिता तीन देशहरूले आयोजना गरिरहेको हुनाले, यसको मात्रा पहिलेभन्दा अझ बढी हुन सक्छ। अघिल्ला विश्वकपहरूको तुलनामा अर्डरहरू ५० प्रतिशतले बढ्न सक्छन्। आज, हामी हवाई मार्गबाट पठाउनको लागि अर्डर पनि तयार गर्दैछौं,’ व्यापारी चेन जियानले भने ।

भन्सार तथ्याङ्क अनुसार यस वर्ष जनवरी र फेब्रुअरीमा ३४ करोड अमेरिकी डलरको खेलकुद सामान निर्यात गरेको छ । जुन वार्षिक रूपमा लगभग ३९ प्रतिशतले वृद्धि हो। २०२६ को विश्वकप जुन ११ मा सुरु हुँदैछ। (सीसीटीभीप्लस)

विराटनगर । १६ औँ संस्करणको अन्तराष्टिय आमन्त्रण इटहरी गोल्ड कपको उपाधि गछिया युवा समाजले जितेको छ । इटहरी रंगशालामा सोमबार भएको रात्रीकालीन खेलमा बुढासुब्बा गोल्डकप च्याम्पियन प्लानिङ ब्वाइज युनाईटेडलाई १–० गोल अन्तरले पराजित गर्दै गछियाले उपाधि जितेको हो ।

गछियालाई उपाधि जिताउन दोर्जे तामाङले निर्णायक गोल गरे । उनले खेलको ८७औँ मिनेटमा गरेको गोलनै निर्णायक बन्यो । रामबाजीले प्रहार गरेको कर्णर बल प्लानिङका डिफेन्डरबाट रिफ्लेक्ट भएर आएको थियो । उक्त बललाई दार्जेले उत्कृष्ट गोल गरे । उनी फाइनल खेलको म्यानअफद म्याच घोषित हुँदै नगद १० हजार हात पार्न सफल भए ।

प्रतियोगिताको विजेता टिम गछियाले नगद १० लाख रुपैयाँ र उपविजेता प्लानिङ ब्वाइजले ५ लाख रुपैयाँमा बुझायो । प्रतियोगिताको सर्वोत्कृष्ट खेलाडी गछियाका सुजन चौधरी घोषित भए । उनले नगद १ लाख रुपैयाँ पुरस्कार पाए । प्लानिङ ब्वाइजका निग्मा घिसिङ उत्कृष्ट डिफेण्डर, प्रतापसिंह राई मिडफिल्ड र घोषित भए । गछियाका बिशाल सुनार उत्कृष्ट गोलकिपर, सुजन ढंगोल उत्कृष्ट फरवार्ड, अर्जुन बस्नेत उत्कृष्ट प्रशिक्षक घोषित भए । उनीहरूले जनही नगद २० हजार रुपैयाँ पुरस्कार पाए ।

प्रतियोगिता अवधिभर ६ गोल गरेका प्लानिङ ब्वाइजका कप्तान फागुराम थारुले सर्वाधिक गोलकर्ता भए बापत नगद २५ हजार रुपैयाँ पुरस्कार पाए । राष्ट्रिय जागृती क्लबका युजन राई उदयमान खेलाडी बने । उनले ३२ इन्चको एलइडी टिभी पुरस्कार पाए ।

अन्तिम सेमिफाइनलमा प्लानिङ ब्वाइजले सातदोबाटो यूथ क्लब ललितपुरलाई ६–१ गोलको फराकिलो अन्तरले पराजित गर्दै मोरङको टोलीसँग उपाधि भिडन्त पक्का गरेको थियो । पहिलो सेमिफाइनलमा गछियाले साबिक विजेता मछिन्द्र फुटबल क्लबलाई पराजित गर्दै फाइनलमा स्थान सुरक्षित गरेको थियो ।

गछियाले क्वाटर फाइनलमा नाइजेरियन क्लब जस्टजोन एफसीलाई पराजित गरेको थियो । राष्ट्रिय जागृती क्लबले आयोजना गरेको प्रतियोगितामा दुई विदेशीसहित ८ टिमको सहभागिता रहेको थियो । प्रतियोगिता चैत्र ३० गते देखी सुरु भएको थियो ।

काठमाडौं । नेपाली राष्ट्रिय क्रिकेट टोलीले टी २० आई सिरिजको पहिलो खेलमा आज यूएईविरुद्ध खेल्दैछ । कीर्तिपुरस्थित त्रिवि क्रिकेट मैदानमा यो खेल साँझ ५ बजे सुरु हुनेछ । घरेलु मैदानमा नेपाली टोलीले यूएईविरुद्ध २ खेलको टी २० आई सिरिज खेल्दैछ ।

यस सिरिजका लागि नेपाल क्रिकेट संघ (क्यान) ले दिपेन्द्र सिंह ऐरीको कप्तानीमा टिम खेलाउँदैछ । जसमा दीपेन्द्र सिंह ऐरी (कप्तान), कुशल भुर्तेल, कुशल मल्ल, सन्दीप जोरा, आरिफ सेख, बसिर अहमद, गुलशन झा, लोकेस बम, सन्दीप लामिछाने, नन्दन यादव, सन्तोष यादव, अर्जुन साउद, हेमन्त धामी, साहब आलम र शेर मल्ल रहेका छन् । त्यस्तै बैकल्पिक खेलाडीमा प्रतिस जीसी, नारायण जोशी र रसिद खान रहेका छन् ।

सिरिजको दोस्रो खेल भोली हुने छ । नेपालले पहिलो पटक टी–२० र एकदिवसीय क्रिकेटमा अलग अलग कप्तानको अभ्यास गरेको छ । पहिलो पटक रोहित पौडेल, सोमपाल कामी, करण केसी लगायतका खेलाडी टी–२० टिमबाट बाहिर रहेका छन् । यो शृंखला इतिहासमै पहिलो पटक ‘फ्लडलाइट’मा हुँदैछ ।

विराटनगर । प्लानिङ ब्वाइज काठमाडौँ  १६औँ संस्करणको अन्तर्राष्ट्रिय आमन्त्रण रेडबुल इटहरी गोल्डकप फुटबल प्रतियोगिताको फाइनलमा प्रवेश गरेको छ ।

गत चैत ३० गतेदेखि आयोजक राष्ट्रिय जागृति क्लबद्वारा इटहरीस्थित रंगशालामा रात्रिकालीन रूपमा सञ्चालन भइरहेको प्रतियोगिता अन्तर्गत आज शनिबार सम्पन्न खेलमा प्लानिङ ब्वाइजले सातदोबाटो यूथ क्लब ललितपुरलाई ६–१ फराकिलो गोल अन्तरले पराजित गर्दै उपाधि नजिक पुगेको हो ।

खेलको ५औँ मिनेटमा प्लानिङ ब्वाइजका खेलाडी रोमन भुजेलले पहिलो गोल गर्दै अग्रता दिलाएका थिए । त्यसपछि खेलाडी फागुराम थारुले २९औँ, ३३औँ, ६४औँ र ६८औँ मिनेटमा लगातार चार गोल गर्दै उत्कृष्ट प्रदर्शन गरे । भने प्रताप सिंह राईले ७८औँ मिनेटमा थप एक गोल गर्दै टोलीको जित सुनिश्चित गरेका हुन् ।

सात दोबाटोका तर्फबाट सकल रेग्मीले ४७औँ मिनेटमा सान्त्वना गोल गरेका थिए । आजको खेलको ‘प्लेयर अफ द म्याच’ प्लानिङ ब्वाइजका फागुराम थारु घोषित भए उनलाई नगद रु।१० हजार प्रदान गरिएको कार्यक्रम संयोजक अनुरोध थापाले जानकारी दिए ।

प्रतियोगिताको फाइनल खेल सोमबार वैशाख ७ गते हुनेछ । विजेता टोलीले रु।१० लाख र उपविजेताले रु।५ लाख नगद पुरस्कार प्राप्त गर्नेछन् । साथै, सर्वोत्कृष्ट खेलाडीलाई रु।१ लाख, सर्वाधिक गोलकर्तालाई रु।२५ हजार तथा विभिन्न विधाका उत्कृष्ट खेलाडीलाई जनही रु २० हजार पुरस्कार प्रदान गरिने आयोजकले जनाएको छ ।

विराटनगर । साबिक विजेता मछिन्द्र फुटबल क्लबलाई पराजित गर्दै युवा समाज मोरङ १६ औँ संस्करणको अन्तर्राष्ट्रिय आमन्त्रण इटहरी गोल्ड कपको फाइनलमा प्रवेश गरेको छ ।

शुक्रबार राति सम्पन्न पहिलो सेमिफाइनल खेलमा युवा समाज मोरङले मछिन्द्रलाई सडेनडेथमा ५–४ गोल अन्तरले पराजित गर्दै फाइनल पुग्ने पहिलो टोली बनेको हो । निर्धारित समयमा दुवै टिमले ३–३ गोलको बराबरी खेलेपछि खेलको निर्णय सिधै पेनाल्टी सुट आउटबाट लिइएको हो ।
पेनाल्टीमा पनि दुवै टिमबाट ४–४ गोल भएपछि खेल सडेनडेथमा गएको हो । सडेनडेथमा मछिन्द्रका युवराज ढकालले गोल गर्न सकेनन् ।

त्यसपछि निर्णायक प्रहार गर्न आएका पदम भटराईले गोल गरेपछि युवा समाज उपाधि नजिक पुगेको हो । त्यसअघिको पेनाल्टीमा मछिन्द्रका रोहित चन्द, दिपेश गुरुङ, देबेन्द्र तामाङ र तुसार विश्वकर्माले गोल गर्दा सनिस श्रेष्ठको प्रहार पोलमा लागेर बाहिरिएको थियो । युवा समाजका रामचन्द्र वाजी, विशाल तामाङ, शिशिर लेखी र सृजनराज गौतमले गोल गर्दा कप्तान सुजन चौधरीको प्रहार गोल पोस्टमा लागेर फर्किएको थियो ।
त्यसअघिको निर्धारित समयको १३ औ मिनेटमा मछिन्द्रका प्रदिप बुढाथोकीले गोल गरेर टिमलाई सुरुवाती अग्रता दिलाएका थिए । सौरब लिम्बुले प्रहार गरेको कर्णर बललाई उनले हेड मार्फत गोल गरेका थिए । १६ औँ मिनेटमा प्रदिपले नै थप अर्को गोल गरेपछि मछिन्द्रले २–० को अग्रता लिएको थियो । गोलकिपर प्रमञ्जय गच्छदार अघि बढेको मौकामा उनले प्रहार गरेको बल गोलपोष्टको लाइनमै रहेका विपक्षी डिफेन्डरले क्लियर गर्न नसक्दा मछिन्द्रले अग्रता दोब्बर बनाएको थियो ।

खेलको २२ औँ मिनेटमा युवा समाजका जन्म जय धामीले गोल फर्काएपछि खेल २–१ को अवस्थामा आयो । पदम भटराईले दिएको पासलाई कमजोर डिफेन्स लाइनको फाइदा उठाउँदै धामीले बललाई पोस्टको दिसा दिएका थिए ।

पहिलो हाफको अन्तिम तीन मिनेटको अतिरिक्त समयमा युवा समाजका सुजन डंगोलले गोल गरेपछि खेल २–२ को बराबरीको अवस्थामा आयो । सृजनराज गौतमले दिएको लामो पासलाई डंगोलले आकर्षक हेड गोल गरे । पहिलो हाफ २–२ गोलको बराबरीमा सकिए पनि दोस्रो हाफको २४ औँ मिनेटमा पदम भटराईले गोल गरेपछि मोरङको टोली ३–२ को अग्रतामा लिँदै खेलमा पुनरनगमन गर्यो । तर अन्तिम चार मिनेट सम्हालिन नसक्दा युवा समाजले जीतका लागि पेनाल्टी सुट आउट हुँदै सडेनडेथसम्म कुर्नुप¥यो । दोस्रो हाफको अन्तिम ४ मिनेटको अतिरिक्त समयमा देबेन्द्र तामाङले गोल फर्काएपछि खेल ३–३ को बराबरीमा आयो ।

त्यसपछि खेलको निर्णय पेनाल्टी सुट आउट हुँदै सडेनडेथमा पुगेको हो । खेलको प्लेयरअफद म्याच पदम भटराई घोषित हुँदै नगद १० हजार हात पार्न सफल भए । शनिबारको अन्तिम सेमिफाइनल खेलमा सात दोबाटो युथ क्लब ललितपुर र प्लानिङ ब्वाइज काडमाण्डौबिच खेल हुनेछ । राष्ट्रिय जागृति क्लबले आयोजना गरेको खेलको फाइनल विजेताले नगद १० लाख र उपविजेताले ५ लाख रुपैयाँ पुरस्कार पाउनेछ ।
फाइनल खेल वैशाख ७ गते हुनेछ ।

विराटनगर । सुनसरीको इटहरीमा जारी १६औँ संस्करणको अन्तर्राष्ट्रिय आमन्त्रण इटहरी गोल्ड कपको अन्तिम क्वार्टर फाइनल खेलमा जित निकाल्दै प्लानिङ ब्वाइज युनाइटेड सेमिफाइनलमा प्रवेश गरेको छ ।

बिहीबार राति सम्पन्न खेलमा भारतको युनाइटेड खर्साङ फुटबल क्लब (युकेएफसी) लाई ३–१ गोल अन्तरले पराजित गर्दै प्लानिङ ब्वाइज अन्तिम चारमा पुग्न सफल भएको हो ।

बुढासुब्बा गोल्ड कपको हालैको च्याम्पियन समेत रहेको प्लानिङ ब्वाइजको जितमा कप्तान फागुराम थारुले दुई तथा धिरेन्द्र शाहले एक गोल गरेका छन् ।

खेलको पाँचौँ मिनेटमा युकेएफसीका दिवस रोयले धिरेन्द्र शाहलाई डी–एरियामा लडाएपछि फिफा रेफरी उमेश बिडारीले प्लानिङ ब्वाइजलाई पेनाल्टीको अवसर दिएका थिए । उक्त अवसरलाई कप्तान फागुरामले सहजै गोलमा परिणत गरे ।
२३औँ मिनेटमा फागुरामले विपक्षी गोलकिपरलाई बिट गर्दै व्यक्तिगत दोस्रो गोल गरे ।

यस्तै २७औँ मिनेटमा डिफेन्डरको कमजोरीको फाइदा उठाउँदै धिरेन्द्रले गोल थपेपछि प्लानिङ ब्वाइजले पहिलो हाफमै ३–० को अग्रता बनाएको थियो ।

खेलको ५९औँ मिनेटमा युकेएफसीका निवास राणाले एक गोल फर्काए पनि टोलीको हार टार्न पर्याप्त भएन ।

उत्कृष्ट प्रदर्शन गरेका फागुराम थारु खेलको ‘प्लेयर अफ द म्याच’ घोषित भए । उनले नगद १० हजार रुपैयाँ पुरस्कार प्राप्त गरेका छन् ।
प्रतियोगिता अन्तर्गत शुक्रबारको पहिलो सेमिफाइनल खेलमा युवा समाज र साबिक विजेता मच्छिन्द्र फुटबल क्लबबिच प्रतिस्पर्धा हुने आयोजकले जनाएको छ ।

आगामी वैशाख ७ गते हुने फाइनल खेलको विजेताले नगद १० लाख र उपविजेताले ५ लाख रुपैयाँ पुरस्कार पाउने छन् ।

विराटनगर । १६औँ संस्करणको अन्तर्राष्ट्रिय आमन्त्रण इटहरी गोल्डकप फुटबल प्रतियोगितामा ललितपुरको सातदोबाटो यूथ क्लब सेमिफाइनलमा प्रवेश गरेको छ । बुधबार राति सम्पन्न तेस्रो क्वाटर फाइनल खेलमा आयोजक राष्ट्रिय जागृति क्लबलाई २–० गोल अन्तरले पराजित गर्दै सात दोबाटोले अन्तिम चारमा स्थान सुरक्षित गरेको हो ।

इटहरी रंगशालामा भएको खेलमा सातदोबाटोका सुरजज्यु ठकुरी र समीर तामाङले एक–एक गोल गर्दै टोलीलाई जित दिलाए । खेलको ३१औँ मिनेटमा सुरजले करिब ३० यार्ड टाढाबाट शक्तिशाली प्रहार गर्दै उत्कृष्ट गोल गरेका थिए। त्यसको चार मिनेटमै समीर तामाङले अर्को गोल थप्दै पहिलो हाफमै टोलीलाई २–० को स्पष्ट अग्रता दिलाए ।

पहिलो गोलमा उत्साहित सात दोबाटोले निरन्तर दबाब बनाइरहँदा आयोजक टोली भने सुरक्षात्मक खेलमा सीमित भयो। ३५औँ मिनेटमा राज भुसालको प्रहार गोल पोस्टमा लागेर फर्किएपछि समीर तामाङले रिबाउन्डलाई सदुपयोग गर्दै सहज रूपमा गोलमा परिणत गरेका थिए ।
दोस्रो हाफमा राष्ट्रिय जागृति क्लबले खेलमा फर्कने प्रयास गरे पनि सातदोबाटोको संगठित रक्षापंक्ति अगाडि उनीहरू सफल हुन सकेनन् । घरेलु मैदानमा खेलेको आयोजक टोली भने पहिलो खेलबाटै प्रतियोगिताबाट बाहिरिन बाध्य बन्यो ।

उत्कृष्ट प्रदर्शन गरेका समीर तामाङ ‘प्लेयर अफ द म्याच’ घोषित हुँदै नगद १० हजार रुपैयाँ प्राप्त गरे ।

अब सातदोबाटो यूथ क्लबले फाइनल प्रवेशका लागि अर्को सेमिफाइनल खेलमा प्लानिङ ब्वाइज युनाइटेड र युनाइटेड खरसाङ फुटबल क्लब (यूकेएफसी) बिचको विजेतासँग प्रतिस्पर्धा गर्नेछ । प्रतियोगिताको फाइनल खेल वैशाख ७ गते हुने तय भएको छ। विजेता टोलीले १० लाख र उपविजेताले ५ लाख रुपैयाँ पुरस्कार प्राप्त गर्नेछन् ।