सर्लाहीमा एक परिवारमाथि निर्मम कुटपिट, प्रहरीमाथि निष्क्रियताको आरोप

सर्लाही । सर्लाहीको बसबरिया गाउँपालिका–३, भवानीपुरमा एक परिवारमाथि निर्मम कुटपिट भएको छ। स्थानीय बरण रायका छोरा राम दरेश रायको परिवारले बुधवार हृदय रायकी श्रीमती र छोरीमाथि कुटपिट गरेको पीडित पक्षले जनाएको छ।

पीडित हृदय रायका अनुसार, यसअघि पनि आफ्नो परिवारमाथि पटक–पटक आक्रमण हुँदै आएको भए पनि स्थानीय प्रशासनले कुनै कदम नचालेको गुनासो गरेका छन्। उनका अनुसार कुटपिटपछि प्रहरी चौकी भवानीपुर पुग्दा प्रहरीले उजुरी लिन अस्वीकार गरेको थियो।

भवानीपुर चौकीले सहयोग नगरेपछि उनीहरू इलाका प्रहरी कार्यालय बरहथवा पुगे पनि त्यहाँ पनि उजुरी दर्ता नभएको पीडितले बताएका छन्। कुटपिटबाट घाइते भएकाहरू अहिले बरहथवास्थित गोल्डेन अस्पतालमा उपचाररत छन्।

इलाका प्रहरी कार्यालय बरहथवाका अनुसार, उक्त घटना जग्गासम्बन्धी विवादका कारण भएको बुझिएको छ। घटनामा दुवै पक्षका गरी नौ जना घाइते भएको र ५५ वर्षीय राम दरेश रायलाई पक्राउ गरिएको प्रहरीले जनाएको छ।

पीडित परिवारले घटनाको निष्पक्ष छानबिन गरी दोषीमाथि कानुनी कारबाही गर्न माग गरेका छन्। घटनाबारे थप अनुसन्धान भइरहेको प्रहरीले जनाएको छ।