देउडा क्षेत्रका बादशाह थापाको “पँहेली धानकाबाला २” भिडियोसहित सार्वजनिक

बाजुरा । देउडा क्षेत्रका चर्चित गायक प्रकाश थापाको नयाँ देउडागीत “पँहेली धानकाबाला २” भिडियोसहित सार्वजनिक भएको छ।

२०६१ सालमा “मुटु जल्याकै छ” एल्बममार्फत आएका पँहेली धानकाबाला गीतको सिक्वेल स्वरूप यो गीत सार्वजनिक गरिएको हो। पहिलो संस्करणमा दशैं–तिहारमा घरपरिवारबाट टाढा बस्नुको पीडा समेटिएको थियो भने भाग–२ मा समेत परदेशी नेपालीको संघर्ष, चाडपर्वमा अभाव र परिवारको माया प्रस्तुत गरिएको छ।

गीतमा प्रकाश थापा र देवी घर्तीको स्वर रहेको छ। थापा, राजेन्द्र शाह विपी र अमर विकले शब्द लेखेका छन् भने थापा र अमर विककै संगीत संयोजन छ। विनोद बाजुरेलीको एरेञ्ज, खडक बाजुरेलीको मिक्सिङ, सागर बाजुरेली र डम्मर विकको रेकर्डिङ तथा राजेन्द्र बाजुरेलीको भोकल एडिट रहेको छ।

गौरव गिरीको निर्देशनमा बनेको भिडियोमा राजकुमार सिंह, सामिया कार्कीलगायतले अभिनय गरेका छन्। मालश्री रेकर्डिङ स्टुडियोमा रेकर्ड भएको गीतलाई दशैं–तिहार विशेष गीतका रूपमा प्रस्तुत गरिएको गायक थापाले बताए।

उनका अनुसार गीतले परदेशमा रहेका छोराछोरी र घरदेशमा रहेका आमाबुबा, दिदीबहिनीको मन छुनेछ। भाग–१ जस्तै यो गीतले पनि श्रोतामाझ उस्तै माया पाउने विश्वास उनले व्यक्त गरे। साथै, दर्शक–श्रोताबाट सुझाव र प्रतिक्रिया दिन आग्रह गर्दै उनले आफ्नो साङ्गीतिक जीवन अझ समृद्ध हुने विश्वास व्यक्त गरेका छन्।