पाँच दिनदेखि बेपत्ता भएका दाजु–बहिनी खोलामा मृत फेला

विराटनगर। पाँचथर जिल्लाको याङवरक गाउँपालिका–१ च्याङथापुबाट पाँच दिनअघि बेपत्ता भएका दुई दाजु–बहिनीको शव खोलामा मृत अवस्थामा फेला परेको छ।

नौ वर्षीय शिशिर राई र उनकी ६ वर्षीया बहिनी नानुमा राईको शव मंगलबार बिहान स्थानीय विरुवा खोलाको किनारमा फेला परेको जिल्ला प्रहरी कार्यालय पाँचथरले पुष्टि गरेको छ।

प्रहरीका अनुसार दुवै बालबालिका शुक्रबार बिहान हजुरबुबा–हजुरआमाको घरतर्फ लागेका थिए। त्यसपछि उनीहरू सम्पर्कविहीन भएका थिए।

जिल्ला प्रहरी कार्यालय पाँचथरका प्रमुख, प्रहरी नायब उपरीक्षक (डीएसपी) कौशलकुमार बुढाथोकीका अनुसार प्रारम्भिक अनुसन्धानबाट खोलाले बगाएको देखिए पनि थप अनुसन्धान जारी छ।

बालबालिका बेपत्ता भएपछि प्रहरी चौकी च्याङथापु, जिल्ला प्रहरी कार्यालय पाँचथर र स्थानीय बासिन्दा संयुक्त रुपमा खोजीमा जुटेका थिए।

लगातार चार दिनको खोजीपछि मंगलबार बिहान खोलाको किनारमा दुवैको शव भेटिएको हो। शिशिर र नानुमा गाउँकै पूर्ण आधारभूत विद्यालयका विद्यार्थी थिए।

बालबालिका मृत भेटिएपछि गाउँ शोकमा डुबेको छ। स्थानीय बासिन्दाले दु:ख व्यक्त गर्दै पीडित परिवारप्रति समवेदना जनाएका छन्।